En UNED Ourense realizáronse 1.417 exames correspondentes ao primeiro cuadrimestre do curso académico
Na última semana de xaneiro houbo 510 probas, cifra que ascendeu a 907 na segunda semana de febreiro
OURENSE, 14 de febreiro de 2020.- Un total de 1.417 exames das materias do primeiro cuadrimestre do presente curso académico foron realizados no Centro Asociado á UNED en Ourense. As probas desenvolvéronse con normalidade durante a última semana de xaneiro e a segunda de febreiro, que agora termina.
Durante a primeira semana de probas, realizaron os seus exames 510 estudantes. Esta cifra total foi superada na segunda semana, pola que pasaron 907 persoas que se están formando na Universidade Nacional de Educación a Distancia. Para atender debidamente este complexo proceso que é o dos exames da UNED, encargáronse os dous tribunais constituídos para cada semana. O primeiro tivo como presidenta a María Fátima Yáñez Viveiro, da Facultade de Dereito, como vicepresidente a Jesús Manuel García Díaz, director do Centro Asociado á UNED en Ourense; Andrés López de la LLave Rodríguez, da Facultade de Psicoloxía, como secretario e sendo vogal Pedro Rodríguez-Miñón Cifuentes, da Facultade de Psicoloxía. Este equipo está apoiado polo PAS e polo técnico informático do Centro Asociado.
O segundo tribunal de exames integrárono como presidenta Eloísa Ortega Cantero, da Facultade de Ciencias; Jesús Manuel García Díaz, director de UNED Ourense actuou de vicepresidente; o secretario foi Raúl González Fernández, da Facultade de Ciencias da Educación, sendo vogal Isabel Gómez Veiga, da Facultade de Psicoloxía.
Todos os alumnos deron todo de si nestas sesións na aula de Exames, que se estrutura de maneira idéntica nos 61 centros asociados á UNED do mesmo xeito que os doce centros situados no estranxeiro. Todo o aparello despregado nos exames da UNED é posible grazas á valija virtual e a un gran equipo de profesionais coordinado como un reloxo desde o Servizo de Probas Presenciais da Universidade Nacional de Educación a Distancia. A estes exames preséntanse igualmente os estudantes con discapacidade e fano con total normalidade en sesións a eles adaptadas.
